Retkelä

Pakkauima aamula ennen sianpierua ilimastoithuun authoon ja lähimä puotattamhaan kohti timanttikaivosta. Ajoima tutuiksi tulheitten kylien läpi ja saavutima Jwanengin hyvisä ajoin ennenkö retki sisäle kaivauksheen alako. Passit tiskhiin ja poika haki meile paperit, johon laitoima nimet että emmä syytä kethään mistään emmäkä yritä varastaa mithään. Ja tottelema maan jalokivilakia, jo vain. 

Kiskoima turvakengät jalakhoin ja kypärät päähän, vielä kietasima keltaset liivit varmistamhaan etteivät pillarit aja kumhoon meitä.

Jo oliva kaivanheet kunnon kuopan keskele kaikheutta. Syvvyyttä oli lähemmäs neliäsattaametriä ja levveyesäki piisasi. Jatkosa aikova kaivhauttaa vieläki syvemmäksi, seittemän sattaa metriä aiothaan saavuttaa.

Kauhian kokosia pillareita ja kuormureita ajeli pitkin poikin. Kuulemma tämmönen monsteri viepi diisseliä nelijätonnia vuorosa. Litroisa siis. vuoro kestää kaheksan tuntia ja kaivoksesa paintehaan ympäri vuorokauven, vuoen ympäri, joulunaki.

Tietoa saima timanteista ja niitten kestävyyestä ja senhän teitää että ne kestää. Mutta näinhän se on, että timantit ovat ikuisia mutta timanttikaivoksista ei voi sanua sammaa. Tämäki mainittu kaivos sammuu tuosa reilun kymmenen vuuen kuluttua. Mutta sitä ootellesa tämä saapi kantaa maaliman tuottavimman timanttikaivoksen titteliä.

Lain mukhaan timanttikaivoksia pittää ympäröiä koskematon luonto. Se laittaaki kivan vastinheen sille kauhiale kaivannole. Jwanengisa kaivosaluetta ymäpäröi villielukoitten asuttama puisto, oikheen mukavan näkönen. Näimä siinä aitaa vasten kirahvit ja pahkasiat, paviaanit taleerasivat pitkin teittenlaitoja joka taphauksesa. 

Kovasti hyvvääki tekee alueele tämmönen kaivostoiminta, tarttuvat tauit hoiethaan kaivostoiminnan piikhiin ja yhteisösä tehhään muutaki hyvvää.

Potsvanasa on kolome muuta kaivosta tämän lisäksi. Yks ehtyy vielä aiemmin ko tämä täsä mainittu, Orapasa voivat jatkaa peräti 2040 asti.